Media Coverage


健康最緊要快

上星期有一項健康生活指數調查,有關機構訪問十六個亞太地區一萬一千人,請大家自評對健康和生活習慣嘅滿意度,結果香港評分五十八,同斯里蘭卡一同包尾!

我睇番身邊嘅中環人,尤其係金融從業員,經常對住電腦同電話,行路和坐姿又唔多正確,十個有九個都成日腰痠背痛,疼痛甚至會擴散到臀部、大小腿或雙腳,對生活造成好大影響。我有朋友開會要坐一陣企一陣,名副其實「坐立不安」。   

早前有機會向腦神經外科專科醫生梁顯信請教,佢曾經搶救過唔少病人嘅脊椎神經。梁醫生解釋,以前做腰椎手術係大型手術,𠵱家可以用只有八毫米嘅內窺鏡進入和清除椎間盤脱位部分,直至神經線不再受壓。微創手術過程最快可在二十分鐘至半小時內完成,傷口可縮小至兩厘米,患者即日可以落牀。對於繁忙都市人確係喜訊,亦都藉口再推延治療。   

事實上,都市人愈來愈注重健康,對不同醫療服務嘅需求有增無減,好似剛發盈喜嘅香港醫思醫療集團(2138),佢本身係香港最大醫學美容供應商(按收益計),就係睇準市場發展潛力優厚,積極發展一站式醫療及健康服務,目前在大中華地區直營超過五十個診所或服務中心。旗下醫療服務涵蓋剛才講嘅脊骨神經關節痛治療、牙科、體檢及疫苗注射等。   

一站式醫療中心對於唔使急最緊要快嘅求診人士最為方便,小手術可以唔使去醫院排期做,仲可以喺中心做埋掃描,所以愈來愈受歡迎。醫思醫療就剛公布在中環和旺角設立過萬呎嘅專科診所和放射診斷中心,旺角中心服務樓面達一萬七千平方呎,有專科診所、腫瘤科治療中心、日間手術中心和放射診斷中心,另外仲提供心胸科、耳鼻喉科、普通外科、整形外科、神經外科、骨科和泌尿科醫療服務。𠵱家好多醫保對一啲醫療程序嘅賠償唔再限制必須喺醫院進行,病人喺診所做小手術都大多有得claim,呢類醫療中心更有賣點。   

內地近年流行「智慧診所」,經常往返內地嘅朋友同我講,由於在內地醫院睇醫生,特別係專科,往往大排長龍,智慧診所可以網上預約,並可遠程睇專科醫生,唔使等到天荒地老,更快一步。診所又會先利用Al裝置幫求診者做基本量度,省卻病人等醫生護土嘅時間。   

智慧診所喺香港有冇市場呢?醫思醫療就公布與騰訊(0700)旗下北京企鵝醫生簽訂合作協議,計劃同企鵝醫生聯手在香港開設多間全科診所,將企鵝醫生嘅智慧診所模式引入本地醫療市場。企鵝醫生建立咗「互聯網+實體醫療」模式,喺香港將會點運行?我哋拭目以待。
Source:東周刊 - 陸叔開Chat
Date:2018-06-06