媒體報道


鄧志輝︰重視品牌更重視專業

建立逾十年的香港醫思醫療(2138),準備再下一城,繼廣州後再在內地開設數家醫療美容診所,成為亞洲區醫療及美容首選的服務供應商。陸叔今期續與三位相識近三十載的好拍檔,主席鄧志輝(Eddy)、常務總裁李嘉豪(Gabriel),及資訊科技總監陸韵晟(Ben),暢談公司營商策略及未來發展大計。
陸:近年醫學美容興起,但係市場上之美容機構都可以話係良莠不齊,咁你哋同佢哋有乜嘢分別呢?
輝:陸叔,市面上有好多美容集團係行緊「靚」嘅路線,佢哋可能集中火力去開發同「靚」有關嘅嘢,唔係真真正正去做同醫療相關嘅服務,無論點發展都好,佢哋都可能只係一間好大規模嘅美容連鎖集團。我哋好注重自己個品牌,亦畀心機去做,成為一間醫療美容兼備嘅服務供應商,呢個分別對我哋嚟講可以話係舉足輕重,而且直接影響我哋集團嘅投資策略。
陸:我諗喺你哋呢個行業要搵錢應該好易,但就近年同醫療事故有關嘅負面新聞,數字有上升趨勢,令消費者擔心佢哋要承受嘅風險,咁你哋會做啲咩嘢去畀到信心消費者呢?
輝:市場上競爭的確好大,但我哋應該係全港擁有最多全職專科醫生嘅,我哋當中六成嘅服務都係由專科醫生親自處理,同時我哋投資咗好多資源去唔同嘅醫學美容科目,連醫療管理同牙科嘅服務都有,我相信呢點係令我哋可以突圍而出嘅地方。
陸:照你咁講,消費者點解唔直接去搵做美容嘅醫務所?
輝:無論醫務所抑或我哋,兩者當然可以提供同美容相關嘅醫療服務,我哋嘅優勢可以話除咗提供美容服務之外,仲好重視每位顧客對服務質素嘅體驗,每位客戶我哋都有個別嘅客戶經理去跟進,有別於一般醫務所可能只會有一位護士去招呼你。為咗令顧客更舒服啲,我哋每間醫思醫療嘅分店都會做香薰氣味嘅營銷(sense marketing),即係會點上白茶花嘅香薰,希望客人一聞到呢隻味就好自然會諗起我哋。
豪:陸叔,講到專業性同安全性,政府未訂立法例去規管之前,我哋就已經行快一步做到足,就算政府有一日要規管得再嚴格啲,對我哋都唔會有影響,反而踢走一啲唔合規格嘅經營者,更加係件好事添。
陸:醫思醫療啱啱上市,你哋嘅招股書提到話有一大部分嘅資金,會放喺拓展中國醫學美容市場度,咁你哋嚟緊有咩發展大計?
輝:我哋先講下喺兩地發展嘅進度,喺香港暫時就有十六間、大大小小嘅醫學美容旗艦店同中心,上年開始集團決定將醫思醫療打入內地市場,主攻華南華東嘅一線城市,o依家喺廣州已經開咗間醫學美容診所,上海有一間診所亦都籌備緊,進度仲相當唔錯,我哋期望未來每年可以喺國內開到四至六間分店。
:公司亦會透過手提電話應用方案(mobile apps)同客戶保持緊密嘅聯繫,希望可以提升佢哋嘅消費意欲。
陸:咁你哋國內嘅分店會唔會請番內地人?
輝:呢樣就好靠當年嘅CEPA,可以畀到香港嘅醫生唔使再考試,只需要註冊個營業地址,就可以喺中國執業,變咗我哋可以由香港請醫生返內地,將香港先進技術帶返去內地,當然我哋亦都會請內地醫生嚟香港做培訓,提升佢哋技術之餘兼可以監查佢哋。
陸:咁年輕人想入呢行得唔得?
豪:隨時歡迎任何人加入我哋團隊,不過就會要求同事考入職試,唔達標嘅我哋係唔會請。
陸:你哋咁嚴謹會唔會好難請到相關醫療服務嘅人員?
輝:咁又唔會喎,可能以前我都有諗過做醫生,好明白風險呢個問題,我哋做法亦有別於坊間一啲美容公司,做手術嘅決定權會交番畀醫生,佢哋有好大嘅自由度,如果知道有風險,個客想做我哋都唔會幫佢,仲兼且會全數退番錢畀個客。
陸:咁你哋國內嘅分店係做咩類型嘅醫療服務?
輝:我哋只會專注做連鎖診所,做皮膚科、整形外科、同埋牙科嘅口腔科有關嘅醫療服務,主要針對香港品牌同高端技術嘅客戶。
陸:你哋會唔會擔心中國同香港法律嘅唔同,對經營策略有影響?
輝:我哋係相當負責任嘅醫療服務供應商,同醫療美容服務相關嘅保險全部都會買齊晒。
陸:咁香港上去嘅醫生會唔會怕國內嘅客戶呢,有咩事佢哋都鍾意採取主動o架喎?
豪︰喺香港我哋都有百分之十左右係國內顧客,所以對佢哋都有一定程度嘅認識,亦有相當經驗同信心去處理好顧客服務。坦白講,國內嘅顧客畀得起錢,佢哋都做足資料搜查,仲一定會睇晒啲資料先上嚟。我哋同事嘅表現亦相當專業,佢哋帶上去內地嘅資料、銷售手法、服務同醫生指引嘅標準都跟足香港,啲客嚟得我哋度係一定感受到我哋嘅專業,我哋畀國內客戶嘅服務亦唔會因為地域嘅唔同而有分別。
陸:以我作為一個消費者為例,我一定睇個品牌嘅口碑同服務質素。