媒體報道


鄧志輝:三十載友情不變

陸叔請來於○五年成立的醫思醫療(2138)主席鄧志輝(Eddy)、常務總裁李嘉豪(Gabriel)、及資訊科技總監陸韵晟(Ben),分享三人緣起自同學、之後成為生意上夥伴,醫思醫療又如何發展而成為醫學美容服務供應商,今天且讓三位好拍檔細訴一起打拚的營商點滴,兼細聽鄧為何棄讀港大醫科而從商。
陸:我知你哋唔單止工作上一齊合作,以前讀書時期就已經係好同學,當年你哋係點識㗎?
豪:陸叔,咁就要先講我同Eddy喇,我哋兩個喺小學時就已經係同學仔,後嚟到中四阿Ben就加入一齊讀理科班,嗰時係既開心又瘋狂誇張嘅那些年。我哋除咗一齊見證住大家嘅成長,仲見證埋Eddy喺中四時識到 家嘅太太,仲睇住佢之後嘅二十一年嚟對太太依然死心塌地,哈哈。
陸:咁你哋三個又真係由細識到大喎,除咗學生時期嘅友誼可以一直維持到今日,喺生意上又可以合作就真係唔簡單。
陸:咁你哋係幾時先決定一齊搞生意嘅呢?
輝:咁就要講返少少屋企嘅背景先喇,爸爸喺我中一時中風,由嗰時開始屋企環境就一直麻麻,所以中學時期我就已經開始半工讀,自己賺錢交學費,畢業後我哋其實係各奔前程嘅。
陸:Eddy,係咪咁影響到你往後人生嘅發展,所以當初你會揀去讀醫科呢?
輝:當年我覺得由早做到晚、係咁搏命補習,半工讀賺錢真係唔簡單,之後揀讀醫科我係想有穩定嘅收入可以畀到保障屋企,就算已經無機會幫到爸爸我都希望幫其他人。
陸:咁點解後尾你又會棄醫從商,讀讀吓醫轉咗去讀工商管理嘅?
輝:主要因為我越讀得多書,就發現醫學雖然偉大但有時可以做到嘅事好少,有好多病實際無得醫添;另外讀大學時我要兼職做銷售,點知業績做得好好,更得到老闆嘅賞識,嗰時一年嘅收入就有成幾百萬,自己搞掂生活之餘仲可以照顧到屋企人,我就把心一橫轉咗去讀港大嘅工商管理,諗住就算之後銷售無得做,都仲可以考返個會計師牌攞個雙重保障。
陸:Eddy,你係幾時開始接觸美容行業?
輝:啱啱提過我得到嗰位老闆嘅賞識,仲介紹我去一間上市美容集團「瘦身堂」做營銷管理,我開始接觸到美容纖體,再之後嗰位老闆自己開咗「變靚啲」,我就過咗去幫佢手,我係嗰度學咗好多嘢,好似學識點管理一個營銷品牌,呢啲經驗對我日後喺零五年建立「醫思醫療」有好大幫助。
陸:Gabriel你中學畢業之後嘅去向又係點?
豪:我喺香港大學讀會計金融,諗住畢業出嚟就去五大會計師行(Big Five),但後尾貪得意報咗國泰嘅管理培訓生計劃(MT Program),一做就做咗十三年,哈哈,我呢十三年嚟做過投訴部門、空中服務部、銷售部等等,仲係一直穩步上揚,最後離職前我管成千幾人㗎。
陸:以你喺國泰唔同部門嘅經驗,相信對「醫思醫療」嘅發展一定會幫助好大。
陸:Ben,咁你畢業後嘅發展又係點呢?
晟:中學畢業之後我就去咗美國康奈爾大學度讀計算機科學(Computer Science),畢業後就加入咗Oracle,佢係一間美國軟件公司,同一時間我又讀埋史丹福大學嘅計算機科碩士,碩士畢業後就轉咗去Google度做,仲一路做咗成十年添。
陸:你哋三位中學畢業後各奔前程,又個個都發展得唔錯吖,咁點解會走埋一齊做生意?
晟:畢業之後雖然各有各發展,但係大家一直無間斷過聯絡。喺Google做咗咁多年,留意到頂尖科技公司同一般公司喺科技上差距越嚟越大,我好想將頂尖嘅科技帶去傳統嘅行業,於是近水樓台索性加入好兄弟嘅公司,用技術去幫下佢公司之餘,自己又可以學下傳統行業嘅生意係點運作。
豪:我就喺一四年先加入「醫思醫療」,但之前我都一直有接觸過佢盤生意嘅,始終大家咁熟,平時都會傾下工作上嘅問題,好多時我都會好坦誠咁畀意見Eddy。
輝:Gabriel始終管開一間大公司,當中有好多嘢我都會向佢請教,不過到咗三十歲就開始諗未來十年係咪應該發展自身嘅事業,可能男人接近中年危機時都會諗呢啲問題啩,於是我叫佢認真考慮加入我嘅團隊。
陸:咁當然Gabriel最後應承咗啦,由摯友變合作夥伴,喺現實中我見過有啲最後反目收場嘅例子,你哋有無擔心過呢樣嘢呢?
豪:原先都有擔心過,不過覺得大家都識咗廿幾年,要反面一早就已經反咗啦,何況大家一齊經歷咗好多,又好熟悉彼此嘅脾氣,覺得無咩拆唔掂嘅,我亦覺得醫學美容好有潛力,加埋公司整體發展同表現令我好快決定加入。
陸:咁你哋三個喺公司擔任咩崗位㗎?
豪:Eddy作為老闆佢擔任前鋒帶領公司向前衝,我就負責公司日常嘅管理,阿Ben就唔使多講當然搞返IT嗰瓣啦,大家更可以互補不足令公司發展得更暢順。(待續)
陳永陸
生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。
資料整理:江秀慧 攝影:張恩偉