媒體報道


棄醫從商 變醫學美容一哥

今日上市嘅醫思醫療(2138)名字可能唔多人識,不過佢旗下嘅Dr Reborn,相信未幫襯過亦見過佢鋪天蓋地宣傳,數數手指,公司創辦人Eddy鄧志輝同萬南識咗接近十年,算係見證佢哋公司成長,喺度恭喜Eddy踏入新一頁,今晚即管玩得開心啲,第二朝起身要畀多兩錢肉緊幫公司打拼。
萬南同Eddy其實係不打不相識,當年在下代表一位阿太,投訴Eddy公司做醫療手術出錯,要求巨額賠償。通常呢啲情況都係大家互發律師信往來,點知對方竟要求見面,而且由老闆Eddy親自出馬,向在下解釋阿太的手術其實成功,以及早已同阿太講清楚最多做成點樣。萬南事後盤番阿太,佢粒聲唔出就取消委託,明顯身有屎。
萬南就咁開始同Eddy做成朋友,漸漸發覺佢相當傳奇,當年考入港大讀醫,卻選擇中途輟學做sales搵到第一桶金,輾轉又做老闆搞醫學美容。佢覺得好多人對呢行存有誤解,成日誤以為sales會困客人入黑房迫買療程,喺幾年前搵咗成村律師及營銷高手,設計咗一套行內首創嘅客戶關係系統,客人購買任何預付套票,有7日冷靜期可無條件全額退款;另外若然收到任何負面回應,承諾48小時內有專人處理,7日內進行審查。老實講,如果唔係對公司充滿信心,點敢咁樣倒自己米。
如果以市值計,醫思甫上市已成為醫學美容一哥,不過Eddy唔敢自滿,繼續橫向擴展,除咗賺女人錢之外,男性市場亦唔放過,為咗開拓男士脫鬚根療程,索性自己做埋白老鼠,咁先夠說服力咁話喎,而且每朝早仲慳番唔少剃鬚時間口添。