媒體報道


政壇:CEO以身作則 甘做脫毛白老鼠

做好一份工,朝九晚十一、筋疲力竭、日以繼夜、夜以繼日仲未夠,好似班上市公司掌舵人咁,高薪厚職嘅背後,佢哋更要親身試產品,話之要男士脫毛、去皺,或試穿戰衣,吃生物科技製品,為咗上市,幾盡都要做呀。
近日經營DR REBORN嘅醫思醫療公開招股,公司創辦人兼CEO鄧志輝同COO李嘉豪不斷曝光,原來佢哋都做咗自家脫毛療程,亦做緊脫鬚根療程,實行做真人騷,示範朝早慳唔少剃鬚時間,就可以執正個Look。
唔講唔知,脫幾條毛髮對搞公司上市嘅高層嚟講真係小兒科,好似人稱「卡賓先生」嘅卡賓主席楊紫明,次次出場都度身訂造自家設計嘅戰衣,就係要突出時尚品味兼成為焦點;專做透明質酸嘅華熙生物科技主席趙燕雖然少公開露面,但佢承認用咗自家產品十年,睇番新舊照片對比都未驚過。其他仲有瑞年國際主席兼CEO王福才醫院院長出身,每日都食用自家品牌氨基酸片,經常四出路演,依然精神奕奕,總之,自家有乜,大老闆試咗先,顧客先有信心嘛。只係,咁樣一來,會唔會啲高級管理人員搵工跳槽,需要考慮多一項因素呢?