媒體報道


絲絲講場:醫思高層「執靚」做生招牌

家陣做好上市公司掌舵人呢份工,唔單只要求公司盤數靚咁簡單,仲要瞓身做埋公司個生招牌先掂。為咗上市,佢哋可以去到幾盡?
四位上市公司掌舵人為省靚招牌各出奇謀。
近日經營DR REBORN嘅醫思醫療(02138)公開招股,公司創辦人兼CEO鄧志輝同COO李嘉豪不斷曝光。發覺佢哋外形零舍白淨?冇錯,事關佢哋做咗自家脫毛療程。
齊齊幫襯自家療程
尋日公司市場推廣部高級經理鍾嬋佳(Maggie)同絲絲講開,話唔少男士都會脫鬚根,仲有去皺紋等,兩位高層都做緊脫鬚根療程,朝早慳唔少剃鬚時間執正個Look,不過整個Treatment仲未100%完成。
卡賓主席自製戰衣
為咗上市,脫多幾條毛髮又如何!其實做得上市公司靈魂人物,都預咗被人擺上枱(或索性自己嚟),好似人稱「卡賓先生」嘅卡賓(02030)主席楊紫明,次次出場都度身訂造自家設計嘅戰衣,就係要突出時尚品味兼Eye Catching;專做透明質酸嘅華熙生物科技(00963)主席趙燕甚少公開露面,但都有辦你睇,承認用咗自家產品十年,睇番新舊照片對比都未驚過。
瑞年國際(02010)主席兼CEO王福才醫院院長出身,每日都食用自家品牌氨基酸片,經常四出路演依然精神奕奕,連佢哋位CFO潘翼鵬都係公司忠實用家,每逢應酬要暢飲,都用自家產品「酒漏斗18」打定底兼全程不離手。See!上市點只盤數咁簡單,見識到未。
余絲韻